Quen somos?
A Asociación Galega de Xermanistas (AGX) foi fundada no ano 1996 por estudantes de Filoloxía Alemá da Universidade de Santiago de Compostela. A súa intención era a de darlle maior visibilidade ao alemán en Galicia e contribuír á súa expansión na nosa comunidade, aproveitando o auxe desta lingua a nivel europeo e mundial.
Desde os seus inicios fóronse sumando a este grupo fundador socias e socios interesados en fomentar a lingua e cultura alemás, entre os que se atopan estudantes, profesores/as de EOI, profesores/as de primaria e de ensino medio, profesores/as universitarios, profesionais da tradución, profesionais do ámbito do turismo e doutros sectores vinculados ao uso da lingua alemá.
AGX pertence á súa vez á FAGE (Federación de Asociaciones de Germanistas y Profesores de Alemán en España) e ao IDV (Internationaler Deutschlehrerinnen- und Deutschlehrerverband ou Federación Internacional de Profesoras e Profesores de Alemán).